Gadood

Gadood waa buug sheeko-faneed ah oo u qoran qaab curis-dhable ah. Waxaa qoray Goray Daahir. Waxa uu ka koobanyahay 16 sheeko. Tirada bogaggiisu waa 235 bog oo baal-case ah; baal-casuhu waa nooca loogu jecelyahay ama dadka akhriska daneeyaa ay jecelyihiin, araggana u roon; xitaa culimada suufiyadu kitaabka aan baal-casaha ahayn waxa ay u yiqiineen bidco. Midabka jeldigiisu waa midab Huruudi qurxoon ah oo daymada soo jiidanaya, waa midab sida uu Eebbe sheegay adoomihiisa farax galiya “صفراء لونها تسرالناظرين”

Samays ahaanna, waa buug gacan qabsi wacan, jamashana leh; qacda horaba waxaa aad kuu soo jiidanaya humaaga madoow ee u muuqda qof koodh wayn iyo koofiyaddiisa ku daboolan, ee aad cabbaar ku mashquulaysid in aad kala saartid in uu qofkani sii jeedo iyo in uu soo jeedo, humaaggani waa mid buugga quseeya ee qurux un looguma sawirin jaldigiisa. Kolka aad sawirka kasoo daadagtidba waxa aad hoos ugu imanaysaa magaca buugga oo far waawayn ku qoran “GADOOD”, isna cabbaar ayaad ku dul fikiraysaa, waxa aad is waydiinaysaa waxa uu qoraagu damacsanyahay in laga gadoodo… maya ee waxa uu buuggu ka gadoodi doono. Marka aad dhanka kale u geddisidba buugga waxaad ugu tagaysaa humaagii qofka koodhka wayn xidhnaa oo sheekaynaya, toos ayuu kuugu bilaabayaa sheekadiisa qofkani “dabeyl xooggan ayaa dhacaysaa, mugdi ayaa meel walba qariyay…” intaas markuu ku yidhaahdaba waxaad garanaysaa sababtii aad haddaaye u kala saari wayday in qofkani sii jeedo iyo in uu soo jeedo.Inaga oo aynaan kala furin buugga gudihiisa, ayaa jeldigiisu ina siinayaa farriimo waawayn iyo farshaxan cajiib ah oo aan dhab ahaantii laga dhammaan Karin.

Gorey waxaa uu hal shaashad kaa daawasiinayaa xaaladaha xanuunka badan ee laga cabsado in laga sheekeeyo ama ugu yaraan la qariyo ee ka jira guud ahaan dalka intii uu buburka ahaa, si taxane ah ayuu sheekada kuugu wadayaa, ilaa maalintii uu dhawr casho-jirka aahaa waa uu kaaga sheekaynayaa “Murjux maalmo jira baad ahayd maalinkii ay dawladdu burburtay ee ay mawjad dagaal ahi Muqdisho ka kacday” bogga ugu horreeyaba sidaas ayuu ku billaabmayaa. Intaa un kuma ekaanayo ee Sida Dostoyesvsky ayuu adigana intaada xun ee aad gadaal marisid mar walba gacanta kuu saarayaa. Waxa uu si habsami leh uga sheekaynaya xaalad walba oo gurracan oo ay tahay in laga gadoodo.

Marka aad Gadood akhrinaysid waxa uu ku xasuusinayaa Sheekoyahanno hore oo dunida qarniyo ka maqan, waxa uu ku xasuusinayaa Fyodor Dostoyevsky iyo sidii uu dadka gudahooda uga sheekayn jirey, Leo Tolstoy iyo sidii uu wadciga bulshadiisa suugaantiisa ugu cabbiri jirey, Anton Chekhov iyo mahadhooyinkiisii.

Carbisnaanta iyo Hodontanimada qalinka Goray waxa aad qiraysaa kolka sheeko walba oo aad akhridid uga shakidid in aad adigu goobjoog ka ahayd, dadka jilayana aad mooddid in aad dhammaantood wada garanaysid, waxaadba yaabi meelaha qaar kolka aad mooddid in uu adiga kaa sheekaynayo.

Run sheegga iyo hoga tusaalaynta markii laga yimaado waxa uu adeegsanayaa Goray farshaxan yaab leh, suugaanta noocyadeeda kala geddisan ayuu qalinkiisa kuugu suuraynayaa si uu dhan walba wax kaaga tuso, isaga oo waliba Af jilicsan oo lawada fahmi karo wax ku qoraya, suugaanta jacaylka ayuu adeegsanayaa, tan maadda ayuu adeegsanayaa, sidoo kale suugaan aan la wada isticmaalin ama aanba horey loo adeegsan, oo suugaanta argagaxa loo yaqaan ayuu adeegsanayaa.